Lourixe

Só sei dela que se fai chamar Lourixe neste mundo algo toleado que é a Ciberlandia. E que é filla de Agustín Díaz. Acabo de ler no seu blog Chantosnachaira o seguinte obituario que lle dedica ao xornalista que finou hai tres días: "O meu pai morreu o venres, no bus que o levaba ao aeroporto de Lavacolla para marchar de vacacións coa muller que amaba. Tiña un sopro no corazón e sabía que cando se fose sería así, sen avisar. Pero non contaba con que fose tan cedo, cando estaba a refacer a súa vida: levaba un ano prexubilado, hai menos dun mes que mercara coche e estaba facendo obras na casa da aldea. Aínda está sen desempaquetar a lavadora nova que lle trouxeron o martes".
Impresiona a sencillez coa que se pode contar ben as cousas. Mesmo as que producen tanta dor coma morte dun ser querido. Antes eu non sabía o que era Lourixe. Agora é unha escritora.