lunes, enero 18, 2010

Atracción fatal

Quen dixo que no BNG domina o pensamento único? No tocante á fusión das caixas de aforro, polo menos, non todos ven as cousas igual. A Guillermo Vázquez, actual voceiro dos nacionalistas, saíronlle respondóns Xosé Manuel Beiras e o propio Anxo Quintana.
O primeiro, segundo publica Faro de Vigo, considera que é un erro fusionar as dúas caixas de aforro galegas, e alerta nada menos que sobre o papel de “tonto útil do PP” que pode estar desempeñando a organización política nacionalista. Quintana, presidente dun Instituto Galego de Estudios Europeos e Autonómicos (IGEA) que foi remozado á súa medida, fixo seu un estudio elaborado polo profesor de Economía Financeira e Contabilidade da Universidade de Vigo Francisco Xavier Marínez Cobas para advertir que “dende un punto de vista financeiro, un SIP entre caixas de diferentes territorios é a única opción que previsiblemente eleva a solvencia da caixa e permite o mantemento de emprego, crédito e obra social en Galicia, pero sen dúbida suscita a dúbida sobre o mantemento da galeguidade da caixa resultante”. O informe do IGEA tenta despexar esta redundante dúbida dicindo que “existen mecanismos xurídicos e económicos que aseguran a galeguidade dun SIP a longo prazo”, e sinala que “o natural e desexable sería que as caixas galegas propuxeran como aliadas a outras caixas e comunidades autónomas que persigan a mesma finalidade e nas que o tamaño destas caixas sexa menor ou similar ao das galegas, evitando a asociación con entidades que teñan obxectivos diferentes aos propostos”.
Xa está leado outra vez o asunto das caixas. E a lea agora non ven só do PSdeG-PSOE. Como vai rematar a famosa fusión? Politicamente, como o rosario da aurora. De momento, Quintana vai de compañeiro de viaxe de Caixanova, case da man con Abel Caballero. É curiosa a atracción fatal de Vigo.

3 comentarios:

Anónimo dijo...

Con todos os respetos, pareceu-me rara a unidade de acción neste tema entre PP e BNG cara á Caixa Única do Povo Galego (CUPG)...

Tucho de Canido dijo...

Da man de Caixanova...e do Sr. Rey (Jacinto o do iate) non sí?

Tucho de Canido

Non á fusión dijo...

En defensa de Vigo, di NON á fusión das Caixas. Acude á concentración cidadá. Hoxe, día 9 de febreiro ás 20 horas en Urzaiz. Dende Vía Norte ata Porta do Sol