miércoles, diciembre 03, 2008

Leo Bassi e Iván Prado en Venezuela

O clown-man galego Iván Prado atopouse co xenial italiano Leo Bassi no aeroporto de Barajas. Van camiño de Caracas, onde participarán os dous no Festiclown deste ano. Iván contánolo nesta crónica urxente.

Atopámonos na zona de embarque de Barajas e Leo chega acompañado da súa filla Liza. El pletórico, ela moi emocionada e eu nun estado de calma chicha. Semella que aínda non asumín que vou participar nunha aventura senlleira, das que a min me alimentan, o primeiro contacto do clown-bufón máis importante do noso tempo coa revolución bolivariana.
Apertas, bicos, as primeiras risas e unha breve explicación do noso itinerario. Participaremos no festival internacional de circo de Caracas, no que Bassi fará de presentador na gala oficial, impartirá un curso e actuará nunha das prazas emblemáticas da cidade. Polo de pronto, Liza e mais eu axudaremos na produción e no apartado técnico e segundo parece Leo ten previsto algunha aparición miña en escena.
Compartir escenario con el sempre é algo emocionante, xa sexa como presentador (coma cando fixemos a xira por Galicia contra o Prestige) ou como compañeiro de performance dentro da semana de filosofía de Pontevedra. Pero se ademais podes actuar, daquela, sen lugar a dúbidas a cousa gaña moito.
A miña historia con Leo vén de vello. De feito, o Festiclown débelle moito a este artista total, comprometido e irreverente. Lembro cando o coñecín no hall do teatro principal de Pontevedra, na primeria edición do festival hai case 10 anos. Sen coñecelo de nada saíume da alma darlle unha aperta en plan camaradas baixo a súa mirada de abraio. Entre esa aperta e este avión que nos leva a Venezuela houbo ceas, debates, viaxes en furgoneta ideando un show sobre Fraga, roldas de prensa e moitas horas nos camerinos de distintos teatros, e agora que o lembro, incluso un curso agridoce onde puiden recibir as ensinanzas deste mestre da comedia. Pero o que sempre me sorprendeu del foi a súa humanidade, brillante no intelectual e valente no contacto co mundo.
Non sei como é a cidade nin como será o festival, pero do que estou seguro é que imos vivir momentos históricos: o encontro da forza creativa de Leo coa beleza dunha revolución en marcha.