Touriño baila cha-cha-chá

Emilio Pérez Touriño, presidente da Xunta, foi á Coruña para dicirlles aos de María Pita que o futuro da súa cidade sitúaa “como o motor dun gran espazo supramunicipal que se estende ata Ferrol e como unha das referencias do Eixo Atlántico”. Tamén aproveitou para felicitar aos coruñeses pola celebración do 800 aniversario da cidade, e para apoiar a candidatura da Torre de Hércules a ser recoñecida pola Unesco como Patrimonio da Humanidade.
“Son dúas boas razóns –dixo o presidente– para felicitar aos coruñeses, ao seu alcalde e ás súas institucións públicas e cívicas que están facendo da candidatura da Torre e do octavo centenario unha nova ocasión para a reafirmación da entidade coruñesa, para a lembranza e repaso dunha fascinante historia urbana e para a reflexión sobre o presente e o futuro da cidade”. O curioso do caso é que, para ilustrar palabras tan solemnes, Touriño e o alcalde coruñés, Xavier Losada, fixéronse retratar da guisa que mostra a fotografía ao pé da torre e con seis ducias de figurantes, can negro incluído. Sería para ensaiar un paso de cha-cha-chá? Ou é a Comba de Jalisco?