Marcos Valcárcel di a verdade

Moito lle agradezo a Marcos Valcárcel a mensaxe que mandou ao meu blog. E agrardézollo por dúas razóns. Unha, que Marcos é para min o "blogueiro" galego de referencia. Polo que tivo de precursor no uso deste medio de comunicacion en Galicia e pola mestría que decote nos mostra aos que acreditamos nesta leria. Coido que xa dixen algunha vez, e senón dígoo agora, que lle teño algunha caste de envexa. Sana, pero envexa, Polo ben que o fai en Asuvasnasolaina e pola respectábel e voluminosa aundiencia que ten.
Outra razón para mostrarme agradecido, ademais da xentilexa que mostrou tendo en conta Croques coma un sitio ao que se pode ir, débese á idea que expón de tomar posicións persoais e colectivas sobre o que pasou no hotel Cidade de Vigo. Di Marcos Valcárcel o seguinte na mensaxe que me mandou:
"Se un hotel notase rexeitamento de persoas e colectivos por este tipo de actitudes, cambiaría de inmediato: sobre todo, se lle afecta á conta de resultados. Non estaría mal que todo aquel que puidese, sobre todo clientes habituais, deixase constancia, mesmo escrita, do seu fondo malestar polo desprezo ó noso idioma."
Pois digo eu que está moi ben o que el di e súmome á súa proposta tirando por ela un chisco máis para riba. Non volverei a ser cliente dese hotel mentres que o seu director actual non presente desculpas públicas polo que fixo. Se alguén quere ver o que fixo, non ten máis ca ler o post anterior.