A brigada móvil dos buldógceres avanza de novo. Aínda non comenzou Feijóo a quentar a cadeira de 2.000 euros de San Cateano e xa lle reclamaron que suspenda as Normas do Hábitat para poderen construir como e onde queiran. Son insaciábeis os coroneis do morteiro. Impórtalles un pito que Europa ande anotando o noso nome no taboleiro dos menos respectuosos coa paisaxe e co medio ambiente. Se por eles fose, apedrarían con ladrillo a costa galega erguendo unha muralla de cemento que nos separase de Inglaterra, mar por medio.Conta Roberto Saviano, no seu magnífico Gomorra, que hai empresarios da súa terra que só teñen un credo que se resume neste evanxeo: “A economía tén un arriba e un abaixo. Nós entramos por abaixo e saímos por arriba”. Aquí, por moita culpa que se lle bote á crise, está empezando a pasar algo parecido. Dise que a xente non compra casas ou que só paga menos por elas agora, pero os do morteiro están empeñados en acantilarnos (de cemento) o litoral dende Ribadeo á Garda. Pobres de nós, agora que xa teñen a un dos seus facendo que garda o medio ambiente galego.
E menos mal que o novo presidente tivo a precaución de marcar algunha distancia con eles non lles asistíndo á ceremonia na que oficiaron a misa laica de consagrar os intereses do ladrillo. Nisto, como en moitas outras cousas, Feijóo soubo ser prudente.
4 comentarios:
Digan o que queiran e póñanse como se poñan, pero a cuestión é que sen ladrillo non hai economía: movemento de capital, salarios, innovación, etc. Os construtores galegos non somos mafiosos, somos creadores de postos de traballo e de riqueza en xeral. O litoral ten un potencial enorme que hai que saber renatibilizalo sen estragar a paisaxe nin o medio ambiente, pero é preciso saír do "purismo" ecoloxisteiro se queremos fuxir da crise.
Si,e antes da crise o caso era encher os petos, impórtalles pouco a crise dos demais os contructores. Vender pisos de 1ª calidade (nunca poñen de segunda, e hainos) a prezos de chalet...
Señor Anónimo1, é cousa miña ou non se poden facer casas eternamente?
Digo eu que o espacio e o número de compradores é limitado, non?
E cando se chegue ao límite a que se van adicar os contrutores?
E veña cos anónimos! Non hai maneira de despabilar a imaxinación...
Anónimo 1: sei que ainda pretendedes seguir a encher o país de baleiros? Se non sodes quen de que se ocupe tanto edificio xa construido! Por qué non se da unha volta por outras costas (Irlanda, Cornualles, Bretaña) e aprende a respectar o cidadán? Teñen as suas propostas resolto o acceso; os subministros de auga, electricidade, telecomunicación; a evacuación e tratamento -tratamento, sí- de augas residuais; a recollida e tratamento do lixo e dos refugallos?
A qué raio lle chama "purismo"?
Semella que vostede tenta saír da crise (enténdase: da súa crise) destragando aínda máis o que é de todos...
Atreveríase alguén a non deixar construir en tanto non estea xustificada a necesariedade de todo o xa construido?
Vaia cos "criadores de postos de traballo e de riqueza en xeral": pan pra hoxe, fame pra mañán!
Tucho de Canido
Publicar un comentario